Archive for the ‘கவிதைகள்’ Category

நாகன் யான் எனினும் நாதன் தன் வாய்மையைக் கொள்வீரே!

ஒக்ரோபர் 19, 2012

பூரண வட்டத்தன்
பூரித்திருக்கும் திரு முகத்தன்
காரண கர்த்தன்
யாராலும் வரையவொணா சற்குரு ராஜன்
யாவுமே தான் எழுதுங் கோலன்
நீதி வழுவா செங்கோலன்
நாகத்தை மகுடியாக்கி ஊதுஞ் சீலன்
நேசமே ஞானமென்னும் ஆதி மூலன்
ஞாலத்தே தயா போதியாய் வேரோடிய ஆலன்(ஆல மரம் போன்றவன்)
ஜோதியாம் அருண்மை அம்மை நாதமாங் கருணை எந்தை சமேதமாய்
தேகமெய்க் கருவறை இருதயத் தமர்ந்த உட்குரு பாலன்
“நாகே! எழுதுக!” என ஆணையிட்டே அருள் வாக்கை ஊற்றும் வள்ளல் நாதன்
நாகன் யான் எனினும் நாதன் தன் வாய்மையைக் கொள்வீரே!

Advertisements

பதி(ன்)மூன்று!!!

ஒக்ரோபர் 19, 2012

ஏழாம் பரமும்(நிராதாரம்)
ஆறாம் இகமும்(ஆறாதாரம்)
வேறறக் கூட
ஆ! ஆ!! பதி(ன்)மூன்று!!!(சத்து, சித்து, ஆனந்தம்; அம்மை, அப்பன்,
குருப்பிள்ளை; பிதா, குமாரன், பரிசுத்த ஆவி; அல்லாஹ், புனித ருஹ், ரசூல்)

ஞான வாக்கியம்(கரும்பாக்கள்) – 117

மே 21, 2011

திருத்தச் சுட்டுஞ் சற்குரு ஞானம்
வருத்துங் கர்மந் தீர்க்கும்

திருத்தச் சுட்டுஞ் சற்குரு ஞானம்
வருத்திக் குத்தும் கருமம்

(கர்மம், கருமம் = இருள்சேர் இருவினை)

ஞான வாக்கியம்(கரும்பாக்கள்) – 116

மே 20, 2011
பீடம் மேலமர்ந்த பொய்க்குரு அறியாச்
சீடர் மேல்செருகும் கொக்கி

இருதயத் துள்ளமர்ந்த மெய்க்குரு உயிர்களின்
திருக்கட மெய்யலர்ந்த ஒளிப்பூ

ஞான வாக்கியம்(கரும்பாக்கள்) – 115

மே 19, 2011

மேல்படிகள் ஒன்பதும் மெய்யுள் ஒன்றக்
கீழ்விடியும் பார்அரு ளாட்சி

மேல் படிகள் ஒன்பது

மன்னிப்பு – மூலாதாரம் – முதுகடி
உயிர்ப்பூ அமைப்பு – சுவாதிட்டானம் – நாபியடி
ஆற்றல் – மணிபூரகம் – நாபி
வாசிப்பூ – சூரிய சக்கரம் – மார்படி, உதரவிதானம்
பேரன்பு – அனாகதம் – நடு மார்பு
ஆன்ம நேய ஒருமை, ஒருமையுணர்வு – அமுத கலசம் – தொண்டையடி
தயவு, கருணை – விசுத்தி – தொண்டை
முத்தி – ஆக்கினை – நெற்றி நடு
சத்திசிவ ஐக்கியம் – சஹஸ்ராரம் – தலையுச்சி

அருளாட்சி – பத்தாம் படி

ஞான வாக்கியம்(கரும்பாக்கள்) – 114

மே 18, 2011

இறந்தகால இருள்சேர் இருவினை சேராமல்
இக்கணத்தை மீட்கவே மன்னிப்பு

பவக்கடல் தாண்ட ஆண்டவனின் மின்விசைப்
படகெனும் மன்னிப் பேறு

ஞான வாக்கியம்(கரும்பாக்கள்) – 113

மே 17, 2011


மன்னிப்பூ வின்றி மெய்க்கேது உயிர்ப்பூ
உன்னிப்பார் உள்ளே நீ

ஞான வாக்கியம்(கரும்பாக்கள்) – 112

மே 16, 2011

வெட்ட வெளியே தன்மெய் யுணரக்
கொட்டும் ஒளியே உயிர்ப்பூ

கருமச் சுழலை உயிர்ப்பூச் சுழலில்
கரைக்க மெய்யே ஒளிப்பூ

ஞான வாக்கியம்(கரும்பாக்கள்) – 111

மே 13, 2011

பருப்பொருளின் மெய்ப்பொருளாய் வாழும் அருளைஉட்
குருஒளிப்பூ மொழியால் அறி

பருப்பொருள் = matter
மெய்ப்பொருள் = true meaning
ஒளிப்பூ = language of light

ஞான வாக்கியம்(கரும்பாக்கள்) – 110

மே 11, 2011

பரஞ்ஜோதி அளிக்கும் ஒளிப்பூ வாசம்
பரவதேக மெய்க்குள் உயிர்ப்பூ